Intelligänzblatt für Aesch bigott
Intelligänzblatt für Aesch bigott
Abstand halte isch gaar käi Brobleem,
d Lüt wyychen uus, wenn s mii numme scho gseen.
Bundesroot isch e Tschobb, e gäile
jetz daarff är au no s Gäld verdäile,
iich mach wääge däm käi Fröidegump,
dr Ueli git dr s nur uff Pump.
Chineese-Virus isch d Uusreed vom Trump
d „Obama-Care“ fäält jetz sym Land.
Desinfektioon goot vill schnäller
mit em Äigebrannd uus em Chäller.
Exit-Strategie zur Pandemie
hoffentlich gseet daas s Virus yy.
Ferie sinn jetz oortsaabunde,
suscht zaalsch byym Häichoo non e Runde.
Gäischterspiil hän jo käi Räiz,
chaasch noohäär nit emool in d Bäiz.
Home Office machsch unschiniert,
im Pyjama – unrasiert.
Impfschutz-Foorschig gääb käi Gäld,
mäint unseri Basler-Pharmawält.
Jo, ystoo an dr Kasse,
wurd au ooni Kriise basse.
Kitas pflääge d Chinder im ganze Land,
jetz läärme sii dehäi am laufende Band.
Loonersatz foorderen alli,
scho noo zwäi Wuche, dalli-dalli!
Masgge nütze, oder au nit,
Wie wäisch daas, wenn s gaar käiny git?
Nordkorea het Null Infektzioone,
trotzdäm wett ii nit döört woone,
will by däm digge Kim Jong Un,
chunnsch au ooni Virus um.
Oropax hälfe schampaar guet,
geege die ganzi Noochrichtefluet.
Panik-Yychäuf duen ii andere üüberloo,
iich döörff jo nit emool in Laade goo.
Quarantäne numme für die Alte?
Ii ghöör scho, chönntsch se döört au bhalte
Räise isch jetz gaar käi Schlägg,
Rynach isch scho wyt ewägg.
Siibe maageri – siibe fetti Joor,
die letschtere stöön uns no bevoor.
Tangodanze muesch au uffgää,
chaasch nit zwäi Meeter Abstand nää.
UBS und Credit Suisse,
machen e Dividände-Gschyss,
uff dass sich alles doch no looni,
kassiere sii denn au iiry Booni.
Visioone daarffsch trotz allem haa,
pflääg si guet und heeb dii draa.
Wuhan hets schyynts üüberwunde,
sinn d Fläädermüüs ächt au verschwunde?
Xenophobie, miesst jo nit syy,
uff äimool schigge sich alli dryy.
Yoga nützt au nüt am Änd,
wäschisch lieber zwäimool d Händ.
Zuekumpft düte find iich nit glatt,
sicher isch, sy findet statt.
Schnupf
Schaffe d Gmäinrööt vo dehäi
isch im Schloss dr -gäischt eläi.
Äine mäint, es isch käi Dumme,
Gäischt isch suscht au nit vill umme
Uns chaa dr Bundesroot nüt vermyse,
als Aescherbürger kenne mer käi Kriise.
Butze dr Wald, machen e Summerfescht,
bruuchen nit emool e Corona-Tescht.
Gimpft sinn miir scho lang in Aesch,
mit Chluuserwyy und Kaffi-Trääsch.
Schnupf
Dien im Buff, die gäilen Alte
ächt au dr nötig Abstand halte?
Me bespricht sich hüt per Videoo
no mues me nümm ins Büro goo.
Iich wett das nit, do wurd i motze,
wenn alli dien in d Stuube glotze
me chönnt die ville Fläsche gsee
iich dringg nit nur Kamilletee.
.wö
dr Landroot daagt in Baselstadt
z Aesch im Doom wärs doch au glatt
Göön d Lääde wiider uf
Gits üüberall e Buff
D Lüüt dien wie d Hiehner ummelaufe
Und sinnloos jeede Schrott yykaufe
Dr schreeg Vogel
d Laag isch ärnscht in villle Sache
Humor hesch wenn de glych chasch lache
Jetz bin i grad früsch pensioniert,
gang nümm go schaffe glatt rasiert.
Das Joor im Merze isch s so wyt
iich ha mi gfreut gha uf die Zytt.
Solang my Frau schafft, e Jöörli, zwäi
han iich dr ganz Daag s Huus eläi.
Goot sii am Moorgen uus em Huus,
blyyb iich im waarme Bett und pfuus.
Mach dr ganzi Daag nur was iich wott,
gang uf Bäizetour in Aesch bigott.
Duet dr Schnupf vo wyttem wingge,
göön mer gon e Bierli dringge.
Iich hogg im Fauteuil und stregg d Fiess
mei, isch das Flooner-Lääbe siess!
Chunnt d Frau in Stress und foot a raase
gits vo miir e langi Naase.
Iich ha mi gfreut gha uf die Zytt
syt Aafangs Merze ischs so wyt.
Esoo ischs schöön, esoo chönnts blyybe
nur ab und zue e Väärssli schryybe.
Scho Ändi Hoornig ghöört me munggle,
s gääb e neui Gfoor, me dapp im Dunggle.
E Virus ischs, wo d Lüt verschreggt
au die in Bäärn sin äntlig gweggt.
D Basler Bebbi hän nüt z lache:
s isch das Joor nüt mit Fasnacht mache.
S häisst AeTschBaeTsch au für mi uus Bäärn
iich ha dr Berset drum nümm gäärn.
Dalpi eläi dehäim – e schööne Draum
s töönt uus Bäärn: Miir logge down.
Wär chönn, sell, statt im Büüro schaffe,
bi sich dehäi in Laptop gaffe.
Au my Frau, drab wird i muff
macht dehäi iir Büro uff.
Dr Stubedisch duet si belegge
für mii blybt nur e dungglen Egge
D Frau spiilt dr Scheff, jetz ischs so wyt
und mäint, iich häig zvill freyi Zytt:
Gang in Laade, döört isch d Däsche,
noohäär duesch mer d Wösch no wäsche
denn ab in d Chuchi, s Gmies go schelle
nur d Gschwellti muesch nit nomool schwelle
das gääb numme Pflömm und Brey
noohäär hesch e Stündli frey.
s breech nüt mi doodrgeege z weere
si well mi scho no folge leere!
Iich lyyd in dääre bööse Zytt
syt mitti Merze ischs so wyt.
Mues iich au folge wien e Hund
positiv isch: Iich bi gsund.
Das wünsch iich myne Fründen au
mit Chinder, Hund und au dr Frau.
s bruucht vill Chraft in dääre Zytt
s wäär z hoffe, s Ändi syg nümm wyt!
Dr Dalpi
Iich froog mi öb e Masgge nützt
falls dr Virus us em PeCe sprützt?
Mit ere Fläädermuus us China,
foot die ganzi Pandemie aa.
Zeerscht daarffsch enand d Hand nümme gää,
noohäär muesch zwäi Meeter Abstand nää.
Spöötischtens denn dräit s Hirrni uff „root“:
Griegsch paanischi Angscht ums däägliche Broot.
Worum denn aber Schyssibabyyr go chaufe?
Hesch nüt mee z Ässe, muesch nümm uff s Hüüsli laufe.
Besser gloont hätt sich än Inweschtizioon,
in ä Riisepaggig vo Kondoom.
Schnupf
Dien d Schwoobe nümm in Süüde raase
gseesch uf de Stroosse d Haase graase!
Duur die Kriise duet sich entpuppe,
iich ghöör zun ere vulnerable Gruppe
Zeerscht bruucht daas Woort dr Alain Berset.
Iich güggelen uff dr Stell im Internet.
Döört häissts uff Düütsch: Aafällig, verletzlich,
uff Ladiinisch döönt s nit soo entsetzlich.
Schnupf
Duet au dä Virus wytter wiete
mir löön eus s Lache nit verbiete
Ääne-dääne-disse
Das Virus het ys bschisse
Ääne-dääne-doo
Kasch in käi Bäiz mee go
Ääne-dääne-disse
Dr Nooch-Kontaggt isch grisse
Ääne-dääne-doo
Als Grufti muesch jetz shoppe loo
Ääne-dääne-disse
Kämpfsch noo mit dym Gwüsse?
Ääne-dääne-doo
Ins Tessin daarffsch halt nit go
Ääne-dääne-disse
„Iich sott ganz dringend pisse!“
Ääne-dääne-doo
Daarffsch dröpfliwyys in Laade goo
(daarfsch nit an d Schyybe schiffe,
hesch s noonig ganz begriffe?)
Ääne-dääne-disse
S het erschti Bäize gschlisse
Ääne-dääne-doo
In anderi wottsch nümm go
Ääne-dääne-disse
Dr Fifi het in d Naase bisse
Ääne-dääne-doo
D Masgge losst är nümm loo go
Dr schreeg Vogel
s isch meer als nur e blööde Spleen
hüt isch Lache Medizin
S Bundesamt für Gsundhäit wäiss daas nit,
drbyy wäär s wirgglich dr grööschti Hit,
s wurd käni Nöiinfizierte mee gää,
dääte jetz alli Schnupfdubak nää.
Schnupf
Goots im Vatter vor em PeCe schytter
wüsse d Goofe sicher wytter!