Intelligänzblatt für Aesch bi Gott
10.01.2025
In dr Chluus bin iich dehäi,
döört, wo miir eusi Rääbe häi.
Lueg zu de Rääbe, lueg zum Wyy
und bi bim Feschte gäärn drbyy.
Äimool im Joor, so bini s gwoont,
chumm iich dohii, wo d Preesi droont.
Wo me gnau wäiss was Frau, Maa, Chind
in eusem Doorff nur Voortäil bringt.
Wo me spaare sett an jeedem Egge
ooni d Lüt dermit z verschregge.
Wenn me denn wüsst, wie spaare goot,
no gseen uffäimool alli root!
Iich wott dr Obmaa ghööre brichte
wien är z Aesch well d Faasnacht richte.
Mäinsch är stimm ins Spaarlied yy
spaart an dr Faasnacht d’Energyy?
Är schiggt e Mail, e Gsicht wo lacht:
d Daniela wäiss jo wie mes macht.
Wenn d Blagette chunnt und wo
sett im Aaschlaagschaschte stoo.
Bim Kübler unde sett äin syy
iich schigg my Chnächt, dr Glenn verbyy:
Nur Biecher häigs, für alti Bääse,
wo nooni welle I-Book lääse.
Ich lueg am Donschdig, lueg am Fryttig,
käi Wucheblatt, miir feelt die Zyttig!
Was hänn die z Aarlese für Flause?
sinn die no in dr Wiehnachtspause?
Was weer, wenn d Faasnacht hüt duet staarte?
es miessten alli uff e Räbgäischt waarte!
Iich chas nid haa, es blogt mi s Gwüsse
wenn und wo, daas setti wüsse!
Drum bini äifach füüre choo -
iich bi froo, sinn diir au doo!
Was z Aesch so lauft das suechsch vergääbe
au wär gstoorben isch und nümm duet lääbe!
S isch jetzt verbyy mit gratis ässe
an Lyychemääli, chaschs vergässe!
Wär dört so richtig wett in Ranze byyge
Mues jetz läider Hunger lyyde.
D Hauptsach isch, ass d Faasnacht läbt,
nid wie Räppli an de Soole chläbt!
Dr alti Doorffblatz isch verschwunde
neumen im e Chäller unde.
Online, chasch di druff verloo,
findsch Velo, wo dien ummestoo,
seesch, wo sich wurd en Yybruch loone,
will d Lüt grad in de Ferie floone.
Digital gitts snöischti Gschwätz -
nur analog nümm, das isch lätz!
Sisch dr Doorffblatz nöi e digitale;
dä duet für alli d Gmäini zaale.
Ooni Natel, s weer zwoor gsund,
bisch en analooge Hund!
Iich ha käis - miir chasch nüt sände,
iich froog d Gmäini, öb siis spände!
Loos UKW, blyyb informiert,
au daas stimmt nümm, wills nid rentiert!
Was nutzts em Räbgäischt in dr Chluus?
so wyt vom Gschütz hed är käi Pfuus.
Dorum - sisch nid immer s Lätze,
basst är uff, was d Lüt dien schwätze.
Au so erfaart me das und säll
in dr Zyttig stoots nur halb so schnäll.
Iich ha gnue gschwätzt, jetz loon iis blyybe,
wär no Väärssli wott, sell sälber schryybe.
So nämmed d Gleeser, schängged yy:
Am beschte schmöggt dr Chluuserwyy.
Lüpfed d Gleeser, stoossed aa:
Miir wäi e glatti Faasnacht haa!
Dr Rääbgäischt
Aesch, 10. Hornig 2024
S Aescher Fasnachtscomité isch elter als agnoo. Daas belegge nöi Babbier wo im AetschBaetsch vorligge. Was hänn die Fasnachtsleaks für d Fasnacht '24 für Folge? Wird d Blagedde yygstampft, d Fasnacht gar abgsäit oder verschobe?
Dr AetschBaetsch weiss mee ...
S macht Comité e riese Fescht
mit ville Lüt und Eeregescht.
Die hogge denn am Stroosserand
z Bigge gits so allerhand.
Cüpli gits und Schämpis dryy
villicht sogaar vom Chluserwyy.
Au wenns mes nid so gärn wott ghööre
iich due de feschtlig Jubel stööre.
Iich machs nid gärn, fascht duets mi röie,
iich mues im Comité in d Suppe spöie.
Im Museum hed men uuse gfunde
dä Geburtsdaag hüt isch gar käi runde.
E Doggument, s liggt uf em Disch,
zäigt as Comité no elter isch.
Vor knappe sechzig Joor im Jänner
sitzt me zämme ooni Schämmer.
In dr Eintracht, denn no ooni Bänz,
dä macht erscht spööter sinni Pflänz.
Esoo duets uff der Charte stoo
wo s Nebel Theres hed bechoo.
Mi langi Naase goot ans Comité,
wie rächne Dir? Oo wee, oo wee.
Iich nimm aa, es wird so syy:
me stampft d Blagette wiider yy.
In drey Joor, setts denn e Fasnacht gää,
chasch selli wiider füüre nää.
S Motto basst, sinn alli gsund,
syt sechzig Jöörli laufts z Aesch rund.
Dir diend jetz ab so Fehler lache,
doch chaa me so no Fasnacht mache?
S bescht wär, me wurd in Summer schiebe
und s Comité nomoll lo iiebe.
Halt! Mached käi so dummi Sache.
Mir wäi JETZ go Fasnacht mache!
In paar Bäize, uf dr Strooss
z Aesch bigott isch öbbis looss!
.wö
29. Jänner 2024 - Dr nöi AetschBaetsch isch duss.