Fuerduefel2026

Chindsgi-Provisorium

Wenn du e Gmeindroot wärde wotsch

und grad deheii ir Stuube hoggsch

di frogsch was es so bruucht drfüür

i hilf dr gärn wills bruucht bitz Gspüür

Chasch reede no so guet wie-n-ii

chasch suufe no so viel vom Wyy

s wird di no keine wäähle welle

will däm Volk muesch halt verzelle

«Me chiemi gar nid drum herum

und s brucht e Provisorium»

Dr Fanti-wyy

Dr beschti Wyy, s blybt diskutabel

d Antworte sind variabel

e Galerie, nur für dr Wyy

Die chönnt in Aesch nid besser syy

Vom Kluser bis zum Tschäpperli

Koellreuter isch jo au drbyy

Nid so bekannt zwar wied Toskana,

Drfür gits ir Klus no Lama

Me chas in Aesch au ohni Chianti

nur fehlt halt dr Wyy vor Fanti.

Laufetaalsperri

Erst küürzli hani gnoo mii Chaare

zum an Bahnhof aabefaahre

stoot zmitzt uf dr Hauptstrooss eini

i frog si, was si denn meini

Si seit si chunnt nid so druss

nur schiins chiem jetzt denn do e Bus

d Hauptstrooss stoht still, i los sii

und cheer glaubs doch ind Mühli ii

Jetzt ändlich chunnt dää Bahnersatz,

Das Laufetal kriegt ufde Latz

Dr Trump in Aesch

Är isch no nie in Aesch do gsii

Kennt drum au nid dr beschti wyy

Doch wenn är do si seich würd mache

hätte mir glaub nüm lang z lache

Es goht doch klar um unsre Spinner

wo au dääne immer schlimmer

allne uf de Sack will gooh

jä säägmoll cha dä niemer schloo

Und das i nid in fettnapf tramp

nenn i dr name nid vom Trump.

Infochaschte

Modärn isch Aesch, es isch kei Froog

fascht nüüt me gits no analog,

E Online-Schalter uf dr Gmeini

Crossiety, so sache meini

Nur öppis will ganz Aesch gärn zrugg

jetzt unter öffentlichem Drugg

so modärn sin mir denn halt nooni

s goht halt doch noni ganz ooni

Es intressiert zwar nur die Alte

doch Infochäschte muess me bhalte.

S Flugtrapez ufm Löhrenacker

Mii Frau die mags nüm so verliide

Das i sport so sehr due miide

goht mir täglich uf e Sack

i ghör zum üsserscht fuule Pack

Drum legg i loos, jetzt gangis ah

und suech e Sport woni bitz cha

chli ussergwööhnlich muess es sii

suscht wär dä sport jo nüüt für mii.

Ihr chönned mi jetzt dört nüm stööre

Mi Flug-Trapez-Show uf em Löhre.

D Wasserrächnig

Fehle dir grad e paar Frangge

Kriegsch es au nid vo de Bangge

Schigg e Rächnig in dii Dorf

wo denne jede zahle dörf

Hoffsch dass se jede Aescher zahlt

und das dr Fehler nid uffallt,

Dä Trick het zwar nid funktioniert

Aber me hets glyych mol probiert.

Schribsch uf die Rächnig, s gieng ums Wasser

seisch es wurdi neggscht joor nasser.

Modärni

Gits do im Ruum no neuii frooge

zum Programm wo nid unglooge

schnäller dänggt als jede Mensch

und details weiss wo du nid kennsch

ChatGPT heisst die aawändig

mängisch findis fascht z lebändig

wenn mir d Kaa-ii mit liebem Gruess

seit, dass dr Bangg sich reime muess.

Dr einzig vorteil cha me saage

i muess es bald nüm sälbscht vortraage.

ESC Gäldmachereii

In Basel isch mes go erwarte

Das dr ESC duet starte

I ha mir dänkt i sig e schlaue

dued Gäscht grad über d Ohre haue

Ha mini wohnig gruumt und dänkt

das mir e Fän die Mieti schänggt

Nur sin die Lüüt glych schlau wie iich

sin ab ins Düütsche und Frankriich

Dr Tourismus hät profitiert,

Hät me dr ESC im Löhrenacker duregfiehrt.

Viertelstundetakt

All Viertelstund go S-Bahn faahre

isch doch besser als mim chaare

si fahre öfters, nüm so voll

jo Viertelstundetakt isch toll

Chuum fahrt me denn wieder uf Laufe

nimmsch de chlapf zum go iikaufe

Erinnerisch di nur no grad draa

Aesch het die Viertelstund-Bahn ghaa

Nur dr Kanton dä duet sichs leischte

Lieschtel zahlt halt schiins am meischte.

Parkruumbewirtschaftig

I ha jo mit mim chaare welle

dä am Bahnhof go abstelle

Und dr Zug neh wie sichs ghört

sodass me s Klima nid z fescht stöört

D Parkruumbewirtschaftig fehlt no,

hän au d Franzose mitbechoo

Und d Solothurner hän sich dänkt

In Aesch, sind d Autoparkplätz gschänggt.

Solang in Aesch chasch freii parkiere,

düend Elsässer dominiere.

Stau in Aesch

I hätt jo nid probiere selle

dr chaare z Aesch an Bahnhof stelle,

uf Basel gits jo au e strooss.

drum stiig ich ii und fahr halt loos

I fahr ufd Strooss A18 iih

und lueg diräggt ind Röhre drii

Es staut zu jedre Tagesziit

i glaub nur s trämmli isch no gschiid

Ischs Elfertram die beschti Art?

Au wenns dr Bahnhof Aesch sich spaart.