SCHNUPFNASE 2026

Z Aesch do git me gäärn zum Beschte:

„Miir Aescher chönne richtig feschte.“

Jo dr Banndaag find iich au supertoll,

solang en d Müüli macht, wird käi Mensch mee voll.

S isch gwaltig, wie wyt miir hüt scho syy,

Glyy fliege mer uff e Mars – am Mond verbyy.

Was miir nit chönne, syy nur ganz weenig Sache,

aber brobier emool, us em e Pfäffiger en Aescher z mache.

Zwäi Joor lang duet d Verwaltig d KI konsultiere:

„Wie duet men en Info-Chaschten an e Wand montiere?“

D Antwort isch immer: „Wir können sie nicht verstehn,

iir seid die einzige Gemeinde mit dem Problem.“

Mii Psychiater hed gsäit, jetz mien diir loose:

Iich häig e kompläxi Händy-Psychoose.

Iich müess mi vo üüberflüssige Zwäng befreye

und z allererscht das „Crossiety“ uuse gheye.

Z Aesch chasch immer weeniger chaufe,

für Schue muesch fascht uff Rynach laufe.

Dräggigi Chläider paggsch au nümm in d Däsche,

im Doorff chasch hööchschtens no s Gäld wäsche.

Uff s Pfäffiger Foorum syy d Pfäffiger stolz, 

erscht rächt mit em Beat Jans, uus äigenem Holz.

Sii sälber göön nit, hoggen am Stammdisch

und wüsse noohäär nümm, waas gsäit worden isch.

Wottsch dy Schatz vermeere, so leegen uff d Bangg,

dasch früener so gsi, hüt nimmt en d Radicant.

Iich haa jo käi Schatz, hööchschtens e baar Batze

und die leeg ii, ganz soorgfältig, under d Matratze.

My Oomi glaubt allne Handy-Noochrichte,

nimmt für baari Münze, was me döört duet brichte.

Jo dr Wätterbricht stimmt, vom Moorge bis z Oobe,

halt äifach um öbbe zwäi Daag verschoobe.

Bekannt isch är wäg sym Geschnatter.

Är syg e Waadebysser, säit dr Rolf Blatter.

Mäint, är wurd sich duur „Digg und Dünn“ duure zwänge,

D Froog isch, ob s iim duur s „Dünne“ duet länge?

Finanzielli Brobleem hätte miir nie mee z vermälde,

wenn miir s Glyyche meechte wie die z Birsfälde.

Jo die Büesste wuurde hässig und hässiger,

die Mäischte vo dääne wääre Pfäffiger.