Intelligänzblatt für Aesch bigott
Wasser isch zum wäsche doo
Das hed au s Wöschwyb mit bechoo
An dr Fasnacht quakes d Frösch:
s’Wöschwyb wäscht sy Wösch.
S Liecht ab z Nacht isch halb so schlimm
denn si die Alte jo scho alli dinn
und d Räuber z Aesch, so ghört me munggle
hänn alli zämme Schiss im Dunggle.
Me wurd ums Liecht nid so vill chääre,
wenn d Aescher Gmäinrööt heller wäre!
Hesch als jungi Frau, als junge Maa
nid scho ne Fasnachtsgschpuusi gha?
Wottsch s Gvätterle hütte nid lo blyybe
muesch uffs Fuudi e Verträägli schryybe!
Spööter merggsch dym Schäädel aa
do hesch e rächte Bläggout gha!
E Panzerschrangg hed sich dr Schnupf grad gchaufft
dört ligge d Väärss vo däm, wo s ganz Joor lauft.
Setsch ghäim Züüg nid offe ligge loo.
Sogar dr Biden wäiss jetz au wiesoo!
Myny Väärss, iich mach käi Wääse,
häi d Helgemooler alli glääse!
Wie gseesch es, Schnupf, dues überlegge,
chönntsch zum Schrangg dr Schlüssel jo verlegge.
Loosch denn ächtsch d Kanaalbanggknagger choo?
S weer dr Schrangg und s halb Quartier nümm doo!
Häi, wenn d Stroossepfunzle nümme funggle,
ächt d Panzerknagger Schiss im Dunggle?
Z Rynach häi si im Booden unde
d Löösig für en alt Ghäimnis gfunde:
Me chönnti d Gmäinrööt alli spaare
Mit den Aescher wurd me besser faare!
Z Aesch duät dr Cueni alles längge
s bruucht käi Gmainroot sälber dängge
D Christin Koch goot äntlig draa
jetz wott si zäige, was sii chaa.
As d Energie bi iire wytter längt
hätt sii im Draum nie sälber dänggt!
Jetzt losst si iiri Lämpe lampe,
s gitt doch no Lämpe wäg de Lampe.
Im Schuggerboschte sells e Kaffi gää.
Wär wott dr Schlosschäller so no übernää?
Es chönnte d Gmäinirööt, die siebe Niete,
ganz simpel nur dä Chäller hiete!
So häi si, s wurd dr Kasse nutze,
käi Zyt für s Gmänigäld z verbutze.
Ans Schwingfescht z Prattele dien all springe
Au Aesch möcht e Doorfffescht lachen und singe
Mir dringge Schämpis und dien Kaviar bigge
und d Rächnig denn uff Lieschtel schigge!
Wien e Wald voll Affe gitt men aa
goots ans zaalen isch dr Lauber draa!
Gäll Du, und Du, Du kennsch mi nit,
wär kennt das Fasnachtsväärssli nit?
Z Pffäffige, do chlagt miir äine
dä nöii Gmäinroot kenn au käine!
E Rakroor und drey Panzer einesächzig,
no Karabiner, alti, öbbe sächzig,
heds Milidäär bi miir im Gaarte stoo:
Iich han e Luftballoon lo styyge loo!
Wenns bim Noochber s Dach yy säicht
hed dä Ballon allwääg si Hütte bräicht!