Wasser isch zum wäsche doo
Das hed au s Wöschwyb mit bechoo
An dr Fasnacht quakes d Frösch:
s’Wöschwyb wäscht sy Wösch.
My Doggter säit: Chauf diir e Hund
denn muesch go laufe, daas isch gsund!
Jetz mach iich all Daag fuffzig Schritt
wytter möög my Möbbsli nid!
wie s Möbbsli so ne top Figur
Dr gfrääsig Trump z Amerikaa
Cha vo mir us Züri und au Rynach haa.
Dr Musk duet loose, blitzschnell schalte:
Är schrybt das Kaff chasch sälber bhalte!
En ander Kaff, wo niemer wott,
liggt oobe draa, vo Aesch bi Gott!
Es drybt se s Hallebaad uf d Barikaade
s wott d Marianne wytter d Waade baade,
in Eselsmilch, blutt ooni Strümpf
daas verdryybt die chlyynschte Rümpf!
Im Chluuserwyy, es goot nit ooni,
taucht s pensionierte Chluuser Mooni
D Aaschlaagchäschte hed me yynegnoo
Käi Chnoche wäiss, was z’Aesch duet goo.
Jetz dien si d News - me chaas begryffe -
z Neu Aesch vo de Dächer pfyffe!
Käi Gmäiniroot bloogt s schlächte Gwüsse,
die penne und wäi gar nüt wüsse!
S hed dr Schmidli Thomi e nöi Chnöi nid nummen äins, er nimmt grad zwöi
do säit dr Doggter Chräämermaa
ab vier chasch s äinte gratis haa!
Zwäi linggi Händ loot äine fligge
mit zwäi rächte chan är au nit strigge!
Bisch im Summer an dr Sunne glääge
hesch dir d Hut lo duure bräägle
Machs nit wie Schwoobe, s wurd mi gruuse
die wärde bruun vo innen uuse!
Fascht überall stygts us em Boode,
die bruuni Faarb wir wiider Moode!
D Chilche z Pfäffige wird renoviert
gwissgnet und uf Glanz poliert.
Nur öbbis blyybtt, es macht mi Daub
dr römisch klerikali Staub!
S hilft weder d Chilche wüsche, d Egge fääge,
dr Dregg blyybt an de Teppich chlääbe!
D Moni goot, dr Räbgäischt blybt
Wär füllt als Wyyqueen s Defizyt?
Si mues e Boddy haa, e junge, schööne
Wie wäärs me wurdi s Wöschwyyb chrööne!
S chömmen Eeregescht, e ganze Huffe
und iich chaa ändligg gratis suffe!
Dir frooged euch, duet s Wöschwyb spinne?
Iich draag my Möbbsli in dr Däschen inne.
Wott e Räuber an dr Däsche rysse
Duet en my Mops in Doope bysse
jetz wird dä Finger saignant broote