Wie wytter?

De froogsch dii scho, wo s duet abflache,
wie selle miir s in Zuekumpft mache?
Goosch wiider in Gaarten, e bitz in Drägg,
waartet uff dii döört nit schon e Zägg?
Wenn im Summer d Hitz foot aa drugge,
chömme denn Schwäärm vo Diigermugge?
D Chiirsiessigfliege, dr Boorkechääfer,
im Winter dr Holzwuurm zrugg ins Dääfer?

Oder foosch aa schaffe wie verruggt
und stäigerisch s Bruttoinlandprodukt?
Hilffsch em Ueli und syyner ganze Gilde,
so gschnäll wie mööglig d Schulde z tilge?
Duesch wiider wie versässe konsumiere,
dr Böörsekuurs dääglig inspiziere?
Goosch statt an d Wanderig uff Ooberfrick,
jeedes Wuchenänd uff e Städtetrip?

S Äinte oder s Andere isch vercheert,
will Bäides nummen an de Näärve zerrt.
Aagnoo, häigsch ganz e Huffe Gäld,
änderisch si nit, die groossi Wält.
Wäär hed diir denn gholfe in dääre Zyt?
Nur d Familie und e baar weenigi Lüt!
Settsch se wytter pflääge, die Junge, die Alte,
chaasch nur dä chlyy Däil zämme bhalte.

Schnupf

Dräcking

Mi Natel mit dr Dräcking Äpp hani nümme gfunde
Dr Jungi hetts dr Chatz an Schwanz aabunde
s dänggt de Beamti wo d Äpp überwacht
s Wöschwyb drybts in jeder Nacht!

.wö

Usgchocht

Isch s wie friener, fascht normaal?
Isch d Kriise duure, die fataal?
Chasch im Joggeli go joole, singe
wenn si dr Balle nooche springe?
Muesch nümmi wääg Corona beebe
wenn de duesch e Schätzli heebe?

«Syyg alles uff em beschte Wääg
gääbet Soorg und blyybed zwääg»
S isch d Kriise duure, zimmli glyy
s chönn scho im neechschte Früehlig syy.
Säit dr Koch, denn duet är goo
e Jüngere sell jetz aane stoo.

Är häig beduure mit de Chrangge,
Bi de Journi well är sich bedangge.
D Frooge syyge interessant
und – ganz sälte – relevant.
Gscheyti häigs nit vill derbyy
ändligg isch die Zytt verbyy.

Är freu sich jetz uff sy Pensioon
miech für dr Berset nümm dr Gloon.
Zu de Vulnerable ghöör är au,
vum Alter här, är wüss das gnau.
Är hed vill Zytt, muess sich nie fööne
jetz chan är syne Hobby frööne!

.wö