Intelligänzblatt für Aesch bigott
Intelligänzblatt für Aesch bigott
6. Dezämber 2020
S stapft dr Santiglaus duur Drägg und Schnee
no Aesch bigott, iich han en gsee.
Är chunnt bim Schloss chuum ummen Egge,
göön sich d Gmäinrööt go verstegge.
S stellt se dr Schmutzli uff dr Chällerstääge;
vor Schiss wäiss niemer me, was sääge.
Är het e groosse Sagg drbyy,
steggt d Mäitli und die Buebe dryy.
Är nimmt se mit in Schwarze Wald,
wo s finschter isch, und zimmli chalt.
Im Wald, im dieffe Chrache hinde,
leert se dr Schmutzli Ruete binde.
Im Santiglaus ischs gaar nit rächt
si syy äigedlig jo nit so schlächt.
Wenn si z Ooben in dr Stuube sitze
dörffe si am Doom go schnitze.
Am Häiligen Oobe, wenn das d Aescher wäi,
loot är d Gmäinnrööt wiider häi.
Wenn si denn chli gschyyder syy
ischs mit dr Landsgmäin au verbyy.
.wö
20. Novämber 2020
D’Gmäinversammlig isch verschoobe
neu am zwäi z’Midaag, und nümme zoobe
wäägen öbbe fufzg Persoone
deet sich s Stuele nümme loone
me macht se doorum jetz vorusse
im Klartäggscht häisst das dusse
So duet men us dä Räie danze
und friert e Noomidaag an Ranze
Dr Graureiher
Jo dr Verwalter het schyynts no welle,
Züüber mit Warmwasser aanestelle.
Doch sii hän se nümm gfunde, die Sieche,
woorschschyynts baade drin jetz d Grieche.
Schnupf
Trumpiere,
goot üüber studiere.
Schnupf
Oh wie guet, as niemerts wäiss,
dass iich Trumpelstilzli häiss!
Au d Trumpel-Clique z Baasel
het gnueg vo däm sym Gfaasel
dr schreeg Vogel
Dr Donald schimpft: si wäi mi schelle
jetz hööred ändligg uf mit zelle!
Sisch dr beschti Präsi vo dr Gschicht
und glaubt mes nit, so säits e Gricht.
In Arizona mäint dr Benny
uf e Trump wett iich käi Penny.
.wö
2. Novämber 2020
Mir stinggts, es isch mir richtig gschmuuch
iich gspüür dr Ärger dieff im Buuch.
Im Doorff voruss wirds immer stiller:
E Chääfer isch dr Stimmigskiller.
Me gseet en nit, glyych duet s en gää ;
är wott eus Eusi Faasnacht nää.
Zämme mit den Aescher Gäischter
wärde mir däm Chääfer Mäischter.
Gseesch uff dr Strooss nur suuri Stäi
drum schaadets nüt blybsch mee dehäi.
Uff Muulblätz druggsch e luschtig Gsicht
und scho ischs e spezielli Gschicht.
Wäsch immer wiider dyni Händ,
masch s Fänschter uff, s hilft au am Änd.
Nur zämme wirdsch däm Chääfer Mäischter,
daas wüsse nit nur d Aescher Gäischter.
Wenn däm Chääfer s Fueter feelt,
sin mir boll alli putzt und gstreelt.
No chaa me Freud ha, singe, lache
und hoffedlig au Faasnacht mache!
Heebed Soorgg - Blyybed zwääg!
.wö
27. Oktoober 2020
Käi Fasnacht, käi Oktooberfescht,
käi Bsuech dehäi vo liebe Gescht.
S wäär mööglig, au wenns niemer schrybt,
dass dr Wiehnachtsmäärt au kippt.
Allboott mues me zum sich schütze
Kirsch an sinni Doope sprütze.
D Gmäinrööt wüsse, dass eus stinggt
wenn me mit em Loggdaun winggt.
Drum laade si, und zwoor scho glyy
an d Dom- und Budget-Gmäini yy.
Me chönn denn gmietlig zämme sitze
vor lutter Angscht mues käine schwitze.
Macht Covid ächt, duen iich mi frooge,
um d Halle ganz e grosse Booge?
12. Oktoober 2020
Jeede Morge ischs wie immer:
s Radio säit s wird immer schlimmer.
S glych lisisch au im Internet
am Beschte isch blibsch grad im Bett.
D Süchi hed eus fescht im Griff
chasch nümm in d Ferie uf em Schiff.
Luegsch zo de Ami übere Däich
no gseesch die sin grad bös im Säich:
s wird im Trump si Biire wäich und wäicher
und Du vor Schiss grad bläich und bläicher
Uf em Strausakch wär no Platz
für mi aller liebschte Schatz.
Do oobe gits käi Internet
me liggt der ganzi Daag im Bett.
Chasch vo Böösem do nüt ghööre,
Wind und Wätter dien nit stööre.
Scho ändi Jänner, s negschti Joor,
bsuecht mi äin mit graue Hoor:
Iich sell ganz schnell aabe choo
dir siget au no alli doo.
Wäg dr Süchi mies me nümmi blange
Sit Ändi Joor sig si vergange.
S isch in Amerika dr Scheff e Frau
wie z Aesch bigott, do goot das au.
Jo wenns eso wär chönnt me lache
und äinewääg no Fasnacht mache!
.wö
17. Septämber 2020
Wills grad so schön passt: e Värsli us dr Fasnachtszyttig 2020